Суперлигада июль ойининг энг яхши футболчиси аниқланди

Ўзбекистон Профессионал футбол лигаси «Локомотив» ҳужумчиси Марат Бикмаевни июль ойининг энг яхши футболчиси деб эълон қилди.

Овоз бериш натижаларига кўра, 6 ўйинда 5 гол ва 2 голли узатма муаллифига айланган Марат Бикмаев 1-ўринни банд этди. Ушбу футболчи Суперлига клублари ва мураббийлари томонидан энг кўп овоз берилган номзодга айланди. Мухлислар сўровномасида эса Бикмаев учинчи бўлди. Умумий баллар сарҳисобига кўра эса барибир Бикмаевга етадиган рақобатчи топилмади.

Иккинчи поғона эса Тиаго Безеррага насиб этди. Безерра мухлислар ўртасидаги овоз беришда ғолиб бўлди. Лекин мураббийлар ва сардорларнинг аксарияти бу футболчини 2-ўринга лойиқ топишди. 3-ўриндан эса Жавлон Иброҳимов жой олди.

Якунда “Локомотив” ҳужумчиси Марат Бикмаев 49 очко билан энг кўп овоз йиғди. Суперлига мураббийлари ва сардорларидан 12 нафари Бикмаевни 1-ўринга лойиқ топишди. Мухлислар ўртасидаги сўровномада энг кўп овоз олган Тиаго Безерра эса якунда жами 34 очко жамғарди. Учинчи поғонани 24 очко билан Жавлон Иброҳимов банд этди.

Мухлислар ўртасидаги сўровномада қўқонлик ишқибозлар анча дадиллик кўрсатишди. Зеро ҳимоячи бўлишига қарамай 11 метрли нуқтадан адашмай зарбалар йўллаётган Мурод Холмуҳаммедов ишқибозлар ўртасидаги сўровномада 2-ўринни эгаллади ва қўшимча 4 очкога эга бўлди. Бироқ бу унга якуний жадвалда 3-ўринни эгаллаш учун етарли бўлмади.