Шомуродов – Ўзбекистоннинг 2021 йилдаги энг яхши футболчиси, Бердиев – энг яхши мураббий. UZ Football Awards-2021 якунлари 

Маросимда Ўзбекистоннинг 2021 йилдаги энг яхши футболчиси аниқланди. Журналистлар ўртасида ўтказилган овоз бериш якунларига кўра, Элдор Шомуродов «Йилнинг энг яхши футболчиси» деб топилди. Якуний номзодлар учлигидан Ҳусайн Норчаев ва Жалолиддин Машарипов ҳам жой олган эди.

Ўзбекистон миллий жамоаси форварди 2020 йилда ҳам номзодлар қаторида бўлган, аммо ғолиблик Жалолиддин Машариповга насиб қилганди. Римнинг «Рома» клуби ҳужумчиси жорий мавсум А Серияда 15 ўйинда 2та гол муаллифига айланди. 26 ёшли форвард ўтган мавсум «Женоа» сафида Италия чемпионатида 31 баҳсда 8та голга муаллифлик қилган эди.

Йилнинг энг яхши мураббийи дея «Насаф» устози Рўзиқул Бердиев топилди. Рўзиқул Саъдуллаевич Қарши жамоаси билан 2021 йилда Суперлигада 4-ўрин, Суперкубок иштирокчиси, Ўзбекистон кубоги ғолиби ва ОФК кубоги-2021 вице-чемпионига айланди.

Шунингдек, айнан Бердиевнинг шогирди - «Насаф» ҳужумчиси Ҳусайн Норчаев Суперлига-2021нинг энг яхши ўйинчиси деб топилди. 19 ёшли форвард йилнинг энг яхши ёш ўйинчисига топшириладиган «Ёш юлдуз» совринига ҳам эга чиқди.

Суперлига-2021 рамзий терма жамоаси қуйидаги кўриниш олди:

Дарвозабон: Ўткир Юсупов («Навбаҳор»)
Ҳимоячилар: Марко Колакович («Сўғдиёна»), Анзур Исмоилов («Пахтакор»), Ҳусниддин Алиқулов («Насаф»), Шерзод Насруллаев («Насаф»)
Ярим ҳимоячилар: Санжар Турсунов (ОКМК), Эркин Бойдуллаев («Қизилқум»), Драган Черан («Пахтакор») 
Ҳужумчилар: Шоҳруз Норхонов («Сўғдиёна»), Хусаин Норчаев («Насаф»), Азизбек Амонов («Локомотив»).
Мураббий: Улуғбек Бақоев («Сўғдиёна»). 

«Renessans Hall»да ўтган UZ Football Awards-2021 тақдирлаш маросимида жами 24та номинацияда лауреатлар тақдирланди. Жумладан: 

-  Ўзбек футболи нуронийси – Ахбор Имомхўжаев
-  Фидоийлик рамзи – Садри Носиров («Динамо» стадиони ишчиси)
-  Жасорат соврини – Муроджон Аҳмедов (Ўзбекистон кар-соқовлар жамоаси мураббийи)
-  Энг яхши футбол журналисти – Фахриддин Рўзиев
-  Энг яхши ҳудудий ассоциация – Қорақалпоғистон ФА
-  Мухлислар меҳри - «Андижон» фан клуби 
-  Йилнинг энг яхши футзал мураббийи – Баҳодир Аҳмедов (Ўзбекистон / Ҳуахин Жиззах)
-  Йилнинг энг яхши футзалчиси - Дилшод Раҳматов (Ўзбекистон / Ҳуахин Жиззах)
-  Аёллар Олий лигасининг тўпурари – Диёра Ҳабибуллаева
-  Аёллар Олий лигасининг энг яхши мураббийи – Шерали Бобоқулов (Сўғдиёна-W)
-  Аёллар Олий лигасининг энг яхши футболчиси - Диёра Ҳабибуллаева (Сўғдиёна-W)
-  Про лиганинг энг яхши футболчиси – Марко Обрадович (Нефтчи)
-  Миннатдорчилик рамзи – «УзРепорт» ва МТРК жамоаси
-  Йилнинг энг яхши ҳаками – Илгиз Танташев (Бухоро)
- Coca-Cola Суперлигасининг энг чиройли голи – Билолхон Тошмирзаев (Турон)
- Coca-Cola Суперлига-2021 тўпурари – Драган Черан (Пахтакор)
-  Coca-Cola Суперлигасининг энг яхши мураббийи – Питер Ҳюистра (Пахтакор)
-  Coca-Cola Суперлигасининг энг яхши футболчиси – Ҳусайн Норчаев (Насаф)
-  Энг яхши ёшлар мураббийи – Аъзам Шерғозиев (ОКМК ёшлар жамоаси)
-  Ёш юлдуз – Ҳусайн Норчаев (Насаф)
-  Йилнинг энг яхши аёллар мураббийи – Илҳом Ханжариев ()
-  Йилнинг энг яхши аёл футболчиси – Дилдора Нозимова (Бунёдкор)
-  Ўзбекистоннинг энг яхши мураббийи – Рўзиқул Бердиев (Насаф)
-  Ўзбекистоннинг энг яхши футболчиси – Элдор Шомуродов (Рома / Ўзбекистон).