Флоридадаги киберспорт бўйича мусобақада отишма содир этилди

26 августда АҚШнинг Жексонвилл шаҳрида (Флорида штати) американча футбол бўйича киберспорт мусобақасида отишма содир этилди. Мусобақа Jacksonville Landing кўнгилочар мажмуасида ўтаётган бўлган.

Маълум қилинишича, отишмани мусобақа иштирокчиларидан бири, 24 ёшли Дэвид Кац содир этган. Гувоҳларнинг таъкидлашича, у мусобақада ютқазиб қўйгач, одамларни ўққа тута бошлаган.

Отишма оқибатида 2 одам ҳалок бўлган, 11 киши яраланган. Жиноятчи ўз жонига қасд қилган. Яраланганлар шифохонага олиб кетилган.

Кейинроқ мусобақанинг жонли трансляциясидан лавҳалар эълон қилинган. Унда ўйиннинг бориши жараёни ва икки иштирокчини кўриш мумкин. Шунда лаҳзалардан бирида отишма овозлари эшитилиб, видеотрансляция йўқолиб қолган, бироқ аудио ишлашда давом этган. Аудиода одамларнинг бақир-чақирлари ва отишманинг давом этаётганини эшитиш мумкин.