Россия Ўзбекистоннинг логистика бўйича таклифини қўллаб-қувватлади

Россия Ўзбекистоннинг қўшма улгуржи-тақсимлаш тармоқлари ва транспорт-логистика хабларини ташкил этиш бўйича таклифини қўллаб-қувватлади, дея хабар беради Ўзбекистон Ташқи савдо вазирлиги.

Умумий лойиҳаларни амалга ошириш 24 август куни Россия иқтисодий ривожланиш вазири Максим Орешкиннинг Тошкентга ташрифи давомида муҳокама қилинди. У Россия ва Ўзбекистон чегара ҳудудларида улгуржи-тақсимлаш тармоқлари ва транспорт-логистика хабларини ташкил этиш таклифини қўллаб-қувватлаган.

«Бу юкларни ташиш учун қулай шартлар ва махсус тарифларни, шу жумладан транзит мамлакатлар ҳудудлари орқали таъминлайди. Бундан ташқари, ушбу лойиҳа тадбиркорлик субъектларининг транспорт-логистика ва транспорт-экспедицион хизматларини кўрсатиш, шунингдек, юкларни ташиш ҳамда логистика занжирларининг оптимал схемаларини ишлаб чиқиш борасидаги эҳтиёжларини қондириш учун самарали логистика тармоғини шакллантириш имконини беради», - дея таъкидлаб ўтишди Ташқи савдо вазирлигидан. 

Россия томонига экспортни қўллаб-қувватлаш миллий тизимининг («Российский экспортный центр», «Росэксимбанк» ва «ЭСКАР») ихтисослаштирилган муассасалари билан ҳамкорликни фаоллаштириш ҳамда Ўзбекистон банклари ва «Внешэкономбанк» ўртасида шериклик муносабатларини ўрнатиш таклиф қилинди.