«Реал»нинг 7-рақами бошқа ҳужумчига ўтди

«Реал» ҳужумчи Мариано Диасни клуб аъзоси сифатида жамоатчиликка таништирди. Футболчи 7-рақам остида тўп сурадиган бўлди.

Эслатиб ўтамиз, «қироллик клуби» тарихида ушбу рақам Раймон Копа, Амансарио Амаро, Хаунито, Эмилио Бутрагеньо, Рауль ва Криштиану Роналду каби футболчиларга тегишли бўлган.

Каталонияда таваллуд топган доминиканлик Мариано «қироллик клуби» тарбияланувчиси саналади. У клуб тизимида 5 йил фаолият юритгач, 2016/17 йиллар мавсумида асосий жамоага жалб этилган (14 ўйин ва 5 та гол), мавсум якунида «Лион»га сотиб юборилган. Трансфер суммаси 8 миллион еврони ташкил этгани айтилганди.

25 ёшли Диас ўтган йил давомида 1-дивизион вакили сафида 45 ўйин ўтказиб, 21 та гол муаллифи бўлди. У билан 5 йиллик шартнома имзоланган.