Россияда энг катта самолёт-амфибияни ишлаб чиқариш тикланмоқчи

Россиянинг Бирлашган авиасозлик корпорацияси А-40 “Альбатрос” самолёт-амфибияни ишлаб чиқаришни тиклаш лойиҳаси устида иш олиб бормоқда. Бу ҳақда “Гидроавиасалон-2018” кўргазмаси арафасида корпорация матбуот хизмати маълум қилди.    

2016 йилда Қора денгиз флоти денгиз авиацияси раҳбари Геннадий Загонов янги А-40 гидропланлари авиация паркини тўлиқ янгилаш доирасида Бе-12 самолёт-амфибиялар ўрнини эгаллашини маълум қилган.

А-40 “Альбатрос” (Бе-42) — собиқ иттифоқда лойиҳаланган кўп мақсадли самолёт-амфибия бўлиб, Бе-12 ўрнини эгаллаш учун мўлжалланган бўлган. Лойиҳа иттифоқ парчалангандан кейин тўхтатилган. Самолётнинг максимал учиш оғирлиги 90 тоннани ташкил қилади ва бундай кўрсаткичга дунёдаги бошқа бирорта шу турдаги самолёт эга эмас.