Трамп Корея етакчиларининг музокараларига баҳо берди

Фото: AP

Америка Қўшма Штатлари президенти Дональд Трамп Шимолий ва Жанубий Корея етакчилари Ким Чен Ин ҳамда Мун Чжэ Иннинг ўзаро учрашуви якунларини катта умид билан қабул қилди. Бу ҳақда давлат раҳбари твиттердаги ўз саҳифасида ёзган.

Трампнинг сўзларига кўра, КХДР етакчиси ядровий инспекциялар ўтказилиши, шунингдек, ядро объектлари бузиб ташланишига рози бўлган.

«Шунингдек, Шимолий ва Жанубий Корея 2032 йилги Олимпия ўйинларини биргаликда ўтказиш бўйича қўшма ариза топширишга келишиб олди. Жуда ҳаяжонли!» - дея маълум қилган Трамп.

Эслатиб ўтамиз, аввалроқ КХДР ва Жанубий Корея қўшма ҳарбий битимни имзолаганди.

Шу билан бирга, маросимда мамлакатлар етакчилари ҳам иштирок этган. Бунга қадар Ким Чен Ин ва Мун Чжэ Ин ёпиқ эшиклар ортида мулоқот ўтказган.