Қирғизистонда вазир ўринбосари самолётдаги жанжал сабабли лавозимдан бўшатилди

Фото: kenesh.kg

Қирғизистон меҳнат ва ижтимоий ривожланиш вазири ўринбосари Зууракан Каденова у самолёт экипажи билан жанжаллашиши оқибатида халқаро рейсдан олингани ҳақида тарқалган хабар ортидан лавозимидан бўшатилди.

Аввалроқ ижтимоий тармоқларда Каденова “Эйр Астана” авиакомпаниясининг Сеул-Олмаота йўналиши бўйича парвоз қилиши керак бўлган самолётда жанжал чиқаргани ҳақида маълумот пайдо бўлганди.

Гувоҳларнинг таъкидлашича, юқори лавозимли амалдор борт кузатувчилар билан жанжаллашиб, уларга дипломатик паспортини кўрсатган. Оқибатда экипаж сардори аёлни рейсдан олишга қарор қилган.

Айни вақтда Каденова Сеулдаги меҳмонхоналардан бирида қолмоқда. У кейинги рейс билан ватанига қайтарилиши кутилмоқда. Ушбу аёл Сеулда Қирғизистоннинг расмий делегацияси таркибида бўлган.

Тайёрлаган: Шуҳрат Раҳимов

#Қирғизистон #самолёт