Қирғизистон президенти Сооронбай Жээнбеков АҚШга ва ортга оддий рейсда парвоз қилди, деб хабар бермоқда ОАВ.
Куни кеча Қирғизистон президенти БМТ Бош ассамблеясининг Нью-Йоркдаги сессиясида иштирок этди.
Сиёсатшунос Темирлан Сарликбек ўғли самолёт бортида президент билан селфи қилди ва у ўз оддийлиги билан барчани ҳайратга солганини таъкидлади.
«У «Манас» достони, тарихий қаҳрамонлар ва ҳодисалар, шунингдек, янги катта лойиҳанинг бошланиши ҳақида гапириб берди», - дея ёзди сиёсатшунос Facebook’даги ўз саҳифасида.
Жээнбеков билан селфини Қирғизистон Қизил ярим ой Миллий жамияти президенти Азамат Баялинов ҳам эълон қилди.
«Президентимиз Нью-Йоркка қандай парвоз қилгани ва ортга қайтгани ҳақида саволлар тушганди. Жавоб эса бундай - оддий рейсда. Ажойиб», - дея ёзган Баялинов.
Маълумотларга кўра, аввалроқ Сооронбай Жээнбеков Москва ва Ўшга ҳам худди шундай рейс билан парвоз қилган.
