Туркияда лойиҳаланган автомобиль прототипи тақдим қилинди  

Туркиянинг “Zorlu Holding” компанияси турк маҳаллий автомобилини яратиш бўйича консорциум таркибига кирувчи 4 та бошқа компания билан бирга ушбу автомобилнинг илк прототипларини тақдим қилди. 

Маълум қилинишича, прототип “Vestel Elektronik” компанияси билан биргаликда яратилган ва “VEO” деб номланади. 

Аввалроқ Туркия фан, саноат ва технологиялар вазири Фарруҳ Ўзлу Туркияда маҳаллий автомобилни яратишга 3 млрд доллар инвестиция қилинишини маълум қилган. Унинг айтишича, айни вақтда ушбу автомобилнинг турли моделлари прототипларини яратиш бўйича ишлар олиб борилмоқда. Улардан бири электр двигатель билан таъминланади. Автомобилнинг илк прототиплари 2019 йилдаги Женева автосалонида тақдим қилиниши режалаштирилган.

Туркия президенти Ражаб Тоййиб Эрдўған маҳаллий автомобилнинг яратилиши мамлакат иқтисодиётини кучайтиришини айтган. У, шунингдек, автомобиллар қўшни давлатларга экспорт қилинишини қўшимча қилган. 

Туркияда ушбу автомобилни харид қилувчилар махсус истеъмолчилик солиғи тўлашдан озод этиладилар.