Германияда тиббий ходим 100 беморни ўлдирганлигини тан олди    

Германияда собиқ тиббий ходим Нильс Хегель икки шифохонада 100 кишини қасддан ўлдирганлигини тан олди.

Айблов томонининг таъкидлашича, Олденбург шифохонасида камида 36 киши ва Делменхорст шифохонасида 64 киши Хегель қурбонларига айланган. Хегель навбатдаги суд жараёни бошлангандан кейин судьянинг “унга қўйилаётган айбловлар бўйича розилиги-йўқлиги” ҳақидаги саволига тасдиқлов жавобини берган. 

Жиноий иш материалларида таъкидланишича, тиббий ходим беморларга ўлимга олиб келувчи миқдорда дорилар киритган, бироқ охирги лаҳзада уларни ҳаётга қайтариш имконини қолдирган. Бироқ барча ҳолларда ҳам беморларни ҳаётга қайтаришнинг иложи бўлмаган. У ҳамкасблари кўз ўнгида гўёки беморларни ҳаётга қайтаргандек кўринмоқчи бўлган.

Терговчиларнинг фикрича, Хегель бу қилмишини манманлик, зерикиш ва ҳамкасблари олдида ўзини кўрсатиш мақсадида содир этган. 

Хегелнинг қурбонлари 36 ёшдан 94 ёшгача кишилар бўлган, у уларни бирор-бир жиҳатларга қараб танламаган. 

Хегелга нисбатан жорий тергов бошланишигача у кўп йил давомида қамоқда ушлаб турилган. У 2005 йилда Делменхорстдаги шифохонада беморга белгиланмаган дорини киритгандан кейин қўлга олинган. 2008 йилда қотиллик содир этишга уриниш айблови билан 7 йиллик қамоқ жазосига маҳкум қилинган. 

Унга нисбатан иккинчи суд жараёни 2014 йилда Хегель назоратида бўлганда ўлганларнинг оилалари талаби билан бошланган. У 2015 йилда 5 кишини ўлдиришда айбдор деб топилиб, қўшимча 15 йилга қамалган.

Терговнинг тахминича, тиббий ходим қўлидан ўлганлар 200 кишигача етиши мумкин. Бироқ ОАВнинг таъкидлашича, буни исботлаш учун барча далилларни йиғиш кўплаб ўлганларнинг жасади кремация қилингани сабабли мушкул бўлади.