Неймарга 6 йиллик қамоқ жазоси таҳдид қилмоқда

«ПСЖ» ҳужумчиси Неймарга 2013 йилда «Сантос» клубидан «Барселона»га амалга оширилган трансфери бўйича очилган жиноий иш юзасидан 6 йилгача қамоқ жазоси таҳдид солмоқда.

AFP хабарига кўра, Испания суди бу иш бўйича тўпланган ҳужжатларни қайта текширишни бошлаган. 

Бразилиялик футболчи фирибгарлик ва коррупцияда айбланмоқда, у 6 йил муддатга қамалиши мумкин.

Неймардан ташқари, унинг отаси, «Барселона»нинг амалдаги президенти Хосеп Мария Бартомеу ва собиқ президенти Сандро Росель ҳам коррупция иши бўйича судда жавоб беришади. Шунингдек, «Сантос» клуби ва унинг собиқ президенти Одилио Родригес ҳам Неймар трансферини амалга ошириш чоғида фирибгарлик қилганликда айбланмоқда.

Судда даъвогар сифатида DIS инвестиция фонди иштирок этмоқда. У 2013 йилда амалга оширилган битимда Неймарнинг трансфер ҳуқуқига эга бўлган. 

«Барселона» хабарига кўра, Неймарнинг трансфер қиймати 57,1 миллион еврони ташкил қилган. Шундан 40 млн еврони футболчининг оиласи, 17,1 млн еврони «Сантос» клуби олган. DIS эса, футболчининг трансфер ҳуқуқига эга ташкилот сифатида, «Сантос»га теккан улушнинг 6,8 млн евросини олган.