АҚШ Хитойнинг тижорат жосуслиги билан кураш бошлади - CNN

АҚШ президенти Дональд Трампнинг маъмурияти Хитой томонидан иқтисодий жосусликка қарши кураш бўйича чоралар кўрмоқда, дея таъкидлайди CNN телеканали.

Шунингдек, амалдорлар Америка компанияларини ҳимоя қилишга уринишмоқда ва тижорат сирларини ўғирлаш билан кураш бўйича янги чоралар ҳақида эълон қилишди.

Бу ҳафта АҚШ Адлия вазирлиги Хитой давлати назоратидаги компанияга, шунингдек, Тайвань компанияси ва тайванлик уч шахсга айбловлар қўйди. Улар хотира чипларини ишлаб чиқарувчи Micron компаниясидан тижорат сирини ўғирлаш мақсадида тил бириктирганликда айбланмоқда.

«Қўшма Штатларга қарши Хитойнинг иқтисодий жосуслиги ўсиб бормоқда ва бу катта суръатлар билан юз бермоқда. Бугун биз бу ерда шундай баёнот бериш учун йиғилдик: «Бас. Бунга энди тоқат қилмаймиз», - дея АҚШ бош прокурори Жефф Сешнснинг сўзларини келтиради CNN.

Ушбу баёнот АҚШ президенти Дональд Трамп ва Хитой раҳбари Си Цзиньпин ўртасида сўнгги бир неча ой ичида юз берган илк телефон мулоқоти вақтида берилди. Етакчиларнинг мулоқоти икки қудратли давлат ўртасидаги иқтисодий ва сиёсий кескинликнинг ортиши фонида ўтказилди, дея таъкидлайди телеканал.

Бироқ, мулоқот АҚШнинг Пекинга нисбатан тижорат ва интеллектуал жосуслик бўйича айбловини ўзгартириши даргумон, дейилади материалда.

Ушбу ҳафтанинг бошида АҚШ Адлия вазирлиги хитойлик икки жосусни Америка компаниялардан реактив двигателлар технологик ишланмаларини ўғирлашга уринишда айблади. Буларнинг бари АҚШ ва Хитой ўртасида савдо соҳасида ҳам кескинлик юзага келиши таъсир қилмоқда, дея қўшимча қилиб ўтган CNN.

Эслатиб ўтамиз, аввалроқ Трамп Россия, Хитой ва КХДР таҳдиди сабабли разведка ҳамда жосусликка харажатларни оширгани хабар берилганди.