АҚШ Туркиянинг НАТОдан чиқиб кетиши эҳтимолини баҳолади

АҚШ давлат котиби Майк Помпеонинг маълум қилишича, Туркиянинг НАТО таркибидан чиқиб кетиши альянс учун «муваффақиятсизлик» бўлади. Помпеонинг Tony Katz Today радиошоуси учун интервьюси стенограммаси Давлат департаменти сайтида эълон қилинди.

Давлат котибининг умид қилишича, Туркия ҳукумати Қўшма Штатлар Эронга қараганда анча афзалроқ иттифоқдош эканини англайди. Шунингдек, унинг тан олишича, Дональд Трамп президентлик муддатининг бошида АҚШ ва Туркия ўртасида «мураккаб муносабатлар» бўлган. Помпео қайд этишича, бу ҳолат сўнгги пайтларда яхшиланди.

«Агар бу содир бўлганда эди (Туркиянинг НАТО таркибидан чиқиши), бу НАТО учун ҳам, Америка Қўшма Штатлари учун ҳам муваффақиятсизлик бўларди. Менинг ўйлашимча, бундай вазият Туркия халқи томонидан ҳам яхши кутиб олинмасди», - дея хулоса қилди Помпео. 

Эслатиб ўтамиз, аввалроқ АҚШ ва Туркия президентлари Дональд Трамп ҳамда Ражаб Тоййиб Эрдўған Қошиқчи ҳамда Брансон ишини муҳокама қилишганди.