Қирғизистон Ўзбекистонга картошка экспорт қила бошлади

Қирғизистон Ўзбекистонга картошка экспорт қила бошлади, дея хабар берди Қирғизистон Республикаси Қишлоқ хўжалиги вазирлиги.

Тошкент билан музокаралар натижасида эришилган келишувларга кўра, ўзбек томони картошкани импорт қилишга рухсат берилган 17та компания рўйхатини тақдим этди. Натижада, 2000 тонна картошка етказиб бериш учун Иссиқкўл вилоятидаги тадбиркорлар ва Ўзбекистон Республикасининг "Наманган Универсал Савдо Инвест" МЧЖ ўртасида шартнома имзоланди.

Бугунги кунда Ўзбекистонга Иссиқкўл вилоятидан 66 тонна картошка жўнатилди, дея хабар беришган вазирликдан.

Фитосанитар сертификатлаштириш ўзбек томонининг карантин фитосанитария талабларига мувофиқ амалга оширилади.

Қирғизистон Республикаси Қишлоқ хўжалиги, озиқ-овқат саноати ва мелиорация вазирлиги томонидан қишлоқ хўжалиги маҳсулотлари экспорти бўйича кейинги музокаралар олиб борилмоқда.

Хусусан, бугун, 2 ноябрь куни, Қирғизистон Республикасининг Тошкентдаги элчихонасида қирғиз картошкаси экспорти масаласини муҳокама қилиш учун ўзбек компанияларининг вакиллари билан навбатдаги учрашув бўлиб ўтмоқда.

Эслатиб ўтамиз, аввалроқ Ўзбекистон ва Қирғизистоннинг «картошка уруши» ҳақида маълумот берилганди.