Флойд Мэйуэзер аралаш яккакураш қоидалари бўйича илк жангини ўтказади

Фото: AP Photo/Isaac Brekken

Америкалик машҳур боксчи Флойд Мэйуэзер 31 декабрда Rizin ташкилоти доирасида аралаш яккакураш (ММА) қоидалари бўйича илк жангини ўтказади.

41 ёшли боксчининг рақиби япониялик кикбоксчи Тенсин Нацукава бўлади.

Енгилмас Мэйуэзер боксда 50 та жангда 50 та ғалабага эришган. У 5 та вазн тоифасида жаҳон чемпиони бўлган. Боксчи 2017 йил 26 августда ўтказган охирги жангида ирландиялик яккакураш жангчиси Конор Макгрегорни техник нокаут билан мағлуб этган.

Охирги вақтда Мэйуэзернинг UFC чемпиони Хабиб Нурмагомедов билан жанг ўтказиши мумкинлиги ҳақида кўплаб гаплар тарқади. Америкаликнинг айтишича, у Хабиб билан фақатгина бокс қоидалари бўйича жанг ўтказишга тайёр. Бунга UFC президенти Дана Уайт Хабибда UFC билан бажариши керак бўлган шартнома борлигини ва Мэйуэзер билан жанг ўтказилса, фақат аралаш яккакураш қоидалари бўйича ўтишини айтган.