ЕЧЛда плей-офф йўлланмасини ҳал қилган илк клуб маълум бўлди

Чемпионлар лигаси гуруҳ босқичи 4-тур баҳсларининг илк кунига келиб, мусобақа плей-офф босқичига йўлланмани ҳал қилган илк клуб номи маълум бўлди. Бу – ушбу турда «Интер» меҳмони бўлиб, 1:1 ҳисобидаги дурангга имзо чеккан «Барселона» жамоасидир.

Каталония гранди 4 та турдан сўнг 10 очко тўплаган ҳолда «B» гуруҳида пешқадамликни қўлига олган. Кейинги ўринларда «Интер» (7 очко), «Тоттенҳэм» (4) ва ПСВ (1) клублари бормоқда. Нидерланд клуби кеча «шпорлар»га мағлуб бўлиб (1:2), плей-офф йўлланмасидан маҳрум бўлди.

Назарий жиҳатдан, Милан ва Лондон жамоалари кейинги икки турда очколар сони бўйича «Барселона»га етиб олиши мумкин, аммо «кўк-анорранглилар» қўшимча кўрсаткичлар ҳисобига 2-ўриндан пастга тушиб кетмайди.