Сурияни тиклаш билан 400га яқин хорижий компания шуғулланади

Тез орада 400га яқин хорижий компания Сурия инфратузилмасини тиклаш ишларини бошлайди, деб маълум қилди Сурия ТИВ раҳбари ўринбосари Айман Сусан.

Сусан ТИВ ҳузуридаги қайта тиклаш иқтисодий масалалари бўлими ўтган йилнинг сентябридан буён бир неча минг сўров олганини, улардан 400тасига розилик берилганини айтди.

"Булар дунёнинг турли бурчакларидан, хусусан, Россия, Хитой, Ҳиндистон ҳамда суриялик эмигрантларнинг 400га яқин компанияси бўлиб, яқин вақт ичида ишлар бошланади", деди у.

У Ғарбдаги душманлик кайфиятида бўлган мамлакатлар Сурияни тиклаш ишларига инвестиция киритиш имкониятини қўлга кирита олмасликларини таъкидлади. Шу билан бирга Сусан бир нечта Италия ва Испания компанияларидан сўровлар тушганини маълум қилди.

Сурияда қуролли низо 2011 йилдан буён давом этмоқда. 2017 йилда Сурия ва Ироқда ИШИД террорчилик гуруҳи устидан ғалаба қозонилгани эълон қилинди.