WP: Трамп ва Макрон ўртасидаги дўстлик тугади

АҚШ президенти Дональд Трампнинг Биринчи жаҳон уруши якунланганига 100 йил тўлиши муносабати билан ташкил этилган хотира тадбирлари туфайли Францияга ташрифи Қўшма Штатлар етакчисининг Европага амалга оширилган навбатдаги ўнғайсиз сафарига айланди. У алоқаларни яхшилаш имкониятидан фойдаланиш ва қурбонлар хотирасига ҳурмат бажо келтириш ўрнига, АҚШ ва европалик ҳамкорлар ўртасида катталашиб бораётган фарқни яққол кўрсатиб қўйди, деб ёзмоқда The Washington Post.

Парижга етиб келмасидан олдин Трамп Франция президенти Эммануэль Макроннинг халқаро хавфсизликка оид сўзларини танқид қилиб, қарама-қаршиликлар борлигини таъкидлаб ўтди.

Шундан кейин Трамп Париждаги ноқулай об-ҳаво туфайли Америка қабристонига режалаштирилган ташрифни ўтказиб юборди. Шу сабабли, Трампни америкалик кузатувчилар ва шарҳловчилар танқид остига олишди. Уларнинг таъкидлашича, ёмон об-ҳаво Америка президентига ўз вазифасини бажариши учун тўсиқ бўлмаслиги керак эди.

Бундан ташқари, Трамп, худди Россия президенти Владимир Путин каби, халқаро етакчиларнинг Елисей майдонлари бўйлаб Зафар аркаси (Триумфал арка)га биргаликда бориши маросимини ўтказиб юборди, у ерда эса Макрон сўзга чиққанди. Нашрнинг таъкидлашича, Франция етакчиси нутқида Трампнинг «Америка ҳаммасидан устун» сиёсатига қарши қаратилган мурожаат бор эди, дейилади материалда.

«Миллатчилик - бу ватанпарварликка нисбатан хиёнат», - деди Макрон.

Нашрнинг қайд этишича, агар Трамп ва Макрон ўртасида қачонлардир яқин дўстона муносабатлар бўлган бўлса-да, дам олиш кунларида ёзилувчи яхши кайфиятдаги твитларга қарамай, энди бу ҳолат ўтмишда қолди.

Германия канцлери Ангела Меркелнинг позицияси Макроннинг қарашларига нисбатан кўпроқ мос келади. Меркель Европадаги энг муҳим сиёсий шахс саналади, аммо у ўз фаолиятининг охирида турибди, дея ёзади газета. Макрон сайловолди кампаниясининг собиқ маслаҳатчиси таъкидлашича, Франция етакчиси Меркелнинг кетиши туфайли «етим қолди», шунингдек, мамлакат ичида машҳурлик рейтинги тушиши оқибатида заифлашди. Таҳлилчиларнинг қайд этишича, айнан шу фарқлар - ҳамда унинг мамлакат ичидаги муаммолари - Макронга «жаҳон етакчиси» бўлишига имкон бермаяпти.