Қўшимча функционаллар
-
Тунги кўриниш
Трамп Ғазо секторида “Тинчлик кенгаши” тузилганини эълон қилди
АҚШ президенти Дональд Трамп пайшанба куни, 15 январда Ғазо сектори тикланишини бошқариб борадиган “Тинчлик кенгаши” тузилганини эълон қилди. Бу тузилмани яратиш Трампнинг Ғазо сектори бўйича тинчлик режасига киради, режада халқаро кучларни жойлаштириш ҳам назарда тутилган. “Тинчлик кенгаши”га АҚШ президентининг ўзи раҳбарлик қилади.
Фото: THE WHITE HOUSE/UPI Photo/Newscom/picture alliance
“Тинчлик кенгаши тузилганини эълон қилиш мен учун катта шараф. Кенгаш таркиби яқин орада маълум қилинади, аммо ишонч билан айта оламанки, бу — исталган вақтда ва исталган жойда тузилган кенгашлар ичидаги энг буюк ва энг нуфузлиси”, — деб ёзди Трамп Truth Social ижтимоий тармоғида.
AFP агентлиги қайд этишича, “Тинчлик кенгаши” ҳақида 15 нафардан иборат фаластинлик технократлар маъмурияти тузилгани эълон қилинганидан кўп ўтмай хабар берилди. У маъмуриятга урушдан кейинги Ғазо секторида кундалик ҳаётни бошқариш вазифаси юклатилган. Маъмурият “Тинчлик кенгаши” назорати остида ишлайди. “Тинчлик кенгаши раиси сифатида мен яқинда тайинланган фаластинлик технократ ҳукуматини қўллаб-қувватлайман”, — деди Трамп.
The Telegraph газетаси хабар беришича, “Тинчлик кенгаши” таркибида эҳтимол Британия, Германия, Франция, Италия, Саудия Арабистони, Қатар, Миср ва Туркия вакиллари бўлади.
14 январ куни АҚШ президентининг махсус вакили Стивен Уиткофф Трамп номидан Ғазо секторида ўт очишни тўхтатишнинг иккинчи босқичига ўтилганини эълон қилди. Бу босқич, жумладан, ҲАМАСни қуролсизлантириш ва Фаластин полициясини қўллаб-қувватлаш мақсадида Ғазо секторида Халқаро барқарорлаштирувчи кучлар (ХБК)ни жойлаштиришни кўзда тутади.
Декабр ойида ЕИ ва АҚШда террористик ташкилот деб тан олинган ҲАМАС ҳаракати бир қатор шартлар бажарилса, қуролни топширишга тайёрлигини билдирган — хусусан, Исроил қўшинлари Ғазо секторидан тўлиқ чиқиб кетиши шарти билан. “(Бизда қурол бўлиши — таҳр.) оккупация ва тажовуз билан изоҳланади. Агар оккупация тугаса, бу қурол давлат назоратига топширилади”, — деган эди ҳаракат етакчиларидан бири Халил ал-Ҳайа.
ҲАМАС ҳаракатининг 2023 йил 7 октябрда Исроилга қилган ҳужуми Яқин Шарқдаги можаронинг кескинлашуви учун бошланғич нуқта бўлди. Ўшанда жангчилар Исроилга ракета зарбалари берган, мамлакат ҳудудига кириб борган ва тахминан 1200 кишини ўлдирган. Шунингдек, улар 250 нафар гаровга олинганларни қўлга олиб, Ғазо секторига олиб кетган. Кейинроқ гаровдагиларнинг бир қисми алмаштирилган ёки озод қилинган, бир қисми ҳалок бўлган.
Исроил бунга жавобан ҲАМАСга қарши уруш эълон қилди. Ғазо секторида қуруқлик амалиёти ва бомбардимонлар оқибатида 70 мингдан ортиқ фаластинлик ҳалок бўлган, 169 мингдан зиёди яраланган.
