Ўзбекистоннинг Австриядаги элчиси ХАЭА бош директори билан учрашди

21 декабрда Ўзбекистоннинг Австриядаги элчиси, Европада хавфсизлик ва ҳамкорлик ташкилотидаги доимий вакили Шерзод Асадов Халқаро атом энергияси агентлиги (ХАЭА) бош директори вазифасини бажарувчи Михаил Чудаковга Ўзбекистоннинг агентликдаги доимий вакили сифатида ишонч ёрлиғини топширди.      

Ушбу маросимдан кейин ўтган мулоқотда Ўзбекистон ва ХАЭА ўртасидаги ҳамкорликни ривожлантиришнинг истиқболли йўналишлари муҳокама қилинди.

Чудаков ХАЭА Ўзбекистонда юз бераётган ижобий ўзгаришлар ва жадал амалга оширилаётган ислоҳотлар ортидан катта қизиқиш билан кузаётганини таъкидлаб ўтган. Унинг айтишича, Ўзбекистон Президенти Шавкат Мирзиёевнинг Ўзбекистонда Марказий Осиёдаги илк атом электр станцияси қуриш ташаббуси таҳсинга сазовордир.

Чудаков Ўзбекистон делегациясининг ХАЭАнинг турли тадбирларида фаол иштирок этишини таъкидлаб ўтди ва Тошкентда октябрь-ноябрь ойларида ўзбекистонлик мутахассисларнинг малакасини оширишга қаратилган иккита семинарнинг самарали ташкиллаштирилгани учун миннатдорлик билдирди. 

Томонлар, шунингдек, қўшма лойиҳаларни амалга оширишнинг амалий жиҳатларини кўриб чиқишди. 

Айни вақтда ХАЭА Ўзбекистонда Фанлар академияси, турли вазирликлар билан 10 та миллий лойиҳани муваффақиятли амалга оширмоқда ва 2020-2021 йилларда Фанлар академияси Ядро физикаси институти, “Ўзатом” агентлиги, Соғлиқни сақлаш вазирлиги, Ўзбекистон Миллий университети ва Самарқанд давлат университети билан биргаликда  амалга оширилиши таклиф қилинган 4 та лойиҳа устида иш олиб бормоқда. 

Михаил Чудаков учрашув сўнгида Ўзбекистон экологик ҳаракатини билдирувчи депутатларни ХАЭАнинг Венадаги бош қароргоҳига таклиф қилган.