Германия ва Дания ўртасидаги кўрфазда сувости туннели қурилади

Германия расмийлари мамлакатни Дания билан боғловчи сувости туннели қурилиши ғоясини маъқуллашди. 8,1 млрд доллар қийматга эга лойиҳа ҳақида Femern A/S қурилиш компанияси маълумотига таяниб, Reuters хабар бермоқда.

Маълум қилинишича, Германиянинг Шлезвиг-Гольштейн федерал ҳудуди Транспорт вазирлиги лойиҳа юзасидан шартнома тузишга розилик берган. Femern A/S вакиллари 14 кун ичида ҳужжатларни ўрганиб чиқишади. Ушбу вақт давомида қурилиш режасига фақат кичик ўзгартишлар киритилиши мумкин.

«Fehmarnbelt» номини олувчи туннель Данияга қарашли Лоллан ва Германияга тегишли Фемарн оролларини ажратиб турувчи Фемарн-Бельт кўрфази остидан ўтиши кўзда тутилган. Йўлнинг узунлиги 19 км.га тенг бўлиб, унинг катта қисми Дания ҳудудидан ўтади. Туннель элементларини ишлаб чиқариш учун йирик завод ва бу конструкцияларнинг транспортировкасини амалга оширувчи порт Даниянинг Родбухавн шаҳрида жойлашади.

Қайд этилишича, сувости туннели иккита изли темир йўл ва тўртта ҳаракатланиш бўлагидан иборат автомобиль йўлини ўз ичига олади.

Туннель ишга туширилгач, бир давлатдан иккинчисига автомобилда бор-йўғи 15 дақиқа, поездда эса 7 дақиқада ўтиб олиш имкони туғилади.

Лойиҳа Дания ҳукуматининг кафолати билан олинадиган кредитлар ҳисобидан молиялаштирилади. Шунингдек, харажатларнинг бир қисми Евроиттифоқ бюджетидан қопланиши белгиланган.

Қўшимча қилинишича, туннель қурилиши учун ариза 2013 йилда берилган ва 2024 йилгача якунланиши мўлжалланган эди, аммо атроф-муҳитни ҳимоя қилувчиларнинг қаршилиги боис унинг кўриб чиқилиши муддати кечиктириб келинган.