Магнитогорскда ҳалок бўлганлар сони ортди

Магнитогорскдаги уйда газ портлаши ва шундан сўнг йўлакнинг қулаши оқибатида ҳалок бўлган яна икки кишининг жасади вайроналар остидан чиқариб олинди. Бу ҳақда ТАСС хабар бермоқда.

«Магнитогорскда яна икки кишининг жасади чиқариб олинди. Ҳозирда ҳалок бўлганларнинг сони етти нафарни ташкил этади», - дея маълум қилишган Россия Фавқулодда вазиятлар вазирлиги матбуот хизматидан.

Қайд этилишича, ҳалок бўлганлардан беш нафарининг шахси аниқланган.

Эслатиб ўтамиз, аввалроқ Магнитогорскда бешинчи қурбоннинг жасади топилгани хабар берилганди.

31 декабрь куни эрталаб соат 4да Магнитогорскда маиший газ портлаши оқибатида ўн қаватли уйнинг подъездларидан бири қулаб тушган. ФВВнинг сўнгги хабарига кўра, портлаш натижасида етти киши ҳалок бўлган, 33 кишининг тақдири номаълум.