«Манчестер Сити» яримҳимоячиси Браим Диас фаолиятини «Реал»да давом эттиради. Бу ҳақда мадридликлар клуби расмий сайтида хабар қилинган.
19 ёшли испаниялик футболчи «қаймоқранглилар» билан 6 йиллик шартнома имзолайди. 7 январь куни Диас тиббий кўрикдан ўтади ва кейин у «Сантьяго Бернабеу» стадионида «Реал»нинг янги футболчиси сифатида таништирилади.
Диаснинг «Манчестер Сити» билан шартномаси ёзда якунига етар ва у эркин агентга айланиши мумкин эди. Аммо «Реал» футболчини январдаёқ сотиб олишни истади. Трансфер қиймати 15 млн еврони ташкил этди, аммо бу қиймат қўшимча бонуслар эвазига яна 7,3 млн еврога ортиши мумкин.
Диас «Малага» клуби тарбияланувчиси ҳисобланади. 2013 йилда у «Манчестер Сити» академиясига ўтказилган, 2016 йилда инглизлар жамоасида дебют қилган. Лекин у жорий мавсумда Англия чемпионатида бирорта ўйинда иштирок этмади.
