Мексикада ёнилғи қувурининг портлаши оқибатида 20 киши ҳалок бўлди

Мексикада 18 январда ёнилғи қувурининг портлаши оқибатида 20 киши ҳалок бўлди, 71 киши жароҳат олди. Бу ҳақда портлаш юз берган Идальго штати губернатори Омар Фаёз маълум қилди.  

Pemex нефть компанияси портлаш қувурнинг ноқонуний кесилиши оқибатида юз берганини тасдиқлаган. 

Портлаш Туспан-Туладаги қувурдан оқаётган ёнилғини бидон ва канистраларга тўплаш учун 350 га яқин одам йиғилганда юз берган. Интернетда воқеа жойидан олинган видеолавҳаларда портлашдан кейин ерда ёнаётган жасадлар ётганини кўриш мумкин бўлган. Маълум қилинишича, воқеа жойига Pemex вакиллари ва ҳарбийлар етиб келган.

Шунингдек, шу куни кечки вақт Керетаро штатида ҳам қувурнинг кесилиши оқибатида ёнғин чиққан. 

Сан Хуан дель Рио муниципалитетининг жамоат хавфсизлиги бошқармаси маълумотларига кўра, ёнғин жойида фуқаролик мудофааси хизмати ва фавқулодда хизматлар ходимлари иш олиб боришган. Таъкидланишича, ёнғин одамлар яшамайдиган ҳудудда юз берган ва шу сабабли аҳолига хавф солмаган.  

2018 йилда Мексикада Pemex компанияси қувурларида 12,5 мингдан кўпроқ кесилган жой топилган. Бу эса 2017 йилгига нисбатан 45 фоиз кўпроқни ташкил қилади. Ҳукумат маълумотларига кўра, 2018 йил охирида компаниянинг ёнилғи ва нефть ўғирланишидан кўрган зарари йилига 60 млрд песодан (3 млрд доллардан кўпроқ) ошган.