Грэҳэм Арнолд: «Ўзбекистон мен кутганимдан кўра кўпроқ вақтини ҳимояда ўтказди»

Австралия терма жамоаси бош мураббийи Грэҳэм Арнолд Осиё Кубоги нимчорак финалида Ўзбекистонга қарши кечган ўйиндан сўнг матбуот анжуманида журналистлар саволларига жавоб қайтарди.

«Қийин учрашувни ўтказдик. Ўзбекистоннинг ҳимоя чизиғи анча мустаҳкам ўйнади. Ёриб кириш учун анча меҳнат қилишимизга тўғри келди. Хавфли вазиятларга якуний зарба билан нуқта қўйишда қийинчиликка дуч келдик. Жамоам мусобақада тўп узатишлар сони бўйича энг яхши натижалардан бирини қайд этмоқда. Биз 930та пас узатдик. Бу нафақат тўпга эгалик қилиш, балки вазиятлардан фойдаланишни ҳам тақозо қилади. Шундай экан, бугунги ўйиндан тўғри хулосалар чиқаришимиз керак.

Мэтю Райан пенальтини қайтара олмаган вазият? У тўпга катта шижоат билан яқинлашган эди. У 120 дақиқа давомида жуда яхши ўйнади. Пенальтини ура олмаганига истисно тариқасида қарайман. Макларен, Икономидис ва Маби каби ёш футболчиларимиз ҳам яхши ўйин ўтказишди. Пенальтилар серияси ҳам улар учун тажриба бўлди. Мен жамоамдаги йигитлар билан фахрланаман.

Очиғини айтганда, қўшимча бўлимларни катта хавотир билан кузатдим. Чунки бундан аввалги 90 дақиқалик ўйин осон кечмаган эди. Дарвозабонимиз жуда яхши сэйвни амалга оширди

Ўзбекистон мен гуруҳ босқичида рўбаро келган рақиблардан кучлироқ эдими? Бу жамоа таркибида индивидуал кучли футболчилар етарлича. Улар мен кутганимдан бироз бошқачароқ ўйин кўрсатишди. Жамоа Япония билан ўйинда кўпроқ ҳужумлар  уюштирганди. Бугун уларнинг ҳимоясидан ўтишимиз қийин кечди, чунки бутун ўйин давомида ўз жарима майдонлари атрофида ўйнашди. Шу жиҳатдан ҳам мен кутганимдан бошқачароқ ўйнашди.

Кейинги ўйин ҳақида тўхталадиган бўлсам, битта яхши томони – уни ҳам Ал-Айнда ўтказамиз, бошқа жойга йўлга чиқишимиз шарт эмас. 120 дақиқалик ўйиндан кейин тикланиб олиш эътиборимиз марказида бўлади. Пенальтилар сериясидаги омад футболчиларга янада ишонч бағишлайди.

Ўйинни биз назорат қилдик, деб ҳисоблайман. Рақибимиз уч кун олдин ўйин ўтказганди, бугун яна 120 дақиқа ўйнади. Бу фактор ҳам аҳамият касб этди. Дарвозамиз дахлсизлигини сақлаб қолганимизни ижобий баҳолайман. Машғулотлар вақтида пенальтилар сериясига ҳам тайёргарлик кўрганимиз рост», – дея Грэҳэм Арнолднинг сўзларини келтирмоқда Kun.uz мухбири.

Австралия терма жамоаси чорак финалда БАА–Қирғизистон жуфтлиги ғолибига тўқнаш келади. «Соккеруз» ярим финал йўлидаги баҳсини 25 январь, жума куни Ал-Айндаги «Ҳазза бин Зайд» стадионида ўтказади.