Японияда императорнинг тахтга ўтирганининг 30 йиллиги нишонланмоқда 

Япония императори Акихито 24 февралда тахтга ўтирганининг 30 йиллигини нишонламоқда. Шу муносабат билан Токиодаги миллий театрда давлат тантанали маросими бўлиб ўтди.

“Биз бу маросимни халқ билан ушбу муҳим санани нишонлаш учун ўтказмоқдамиз”, деб айтган Япония бош вазири Синдзо Абэ кириш нутқида. Унинг айтишича, бу йиллар давомида Акихито япон халқининг бирдамлиги рамзи бўлиб келган. Бош вазир императорнинг мамлакатнинг табиий офатлардан жабрланган аҳолисини қўллаб-қувватлашдаги ролини алоҳида таъкидлаб ўтган.   

Император Акихито тахтга отаси Хирохито ўлимидан кейин 1989 йил 7 январда ўтирган. 

85 ёшли Акихито кекса ёши ва саломатлиги сабабли ўз истаги билан 30 апрелда тахтдан воз кечади. Бу масалада бир марта амал қилувчи қонун ҳам қабул қилинган, чунки амалдаги қонун императордан ўз вазифаларини умри охиригача бажаришни талаб қилади. Бироқ Акихито илтимоси бажо келтирилган.

Акихито урушдан кейинги конституцияга кўра тахтга ўтирган илк япон императори ҳисобланади. У тахтдан ўз хоҳишига кўра воз кечган мамлакат тарихидаги илк монарх ҳам бўлади.