Гуайдо Венесуэлага қайтишини маълум қилди

Фото: РИА Новости / Лео Альварес

Ўзини мамлакатнинг вақтинчалик президенти деб эълон қилган Хуан Гуайдо Венесуэлага қайтаётганини маълум қилди ва янги намойишлар ўтказишга чақирди.

"Мамлакатга қайтаётганимни маълум қиламан ва бутун мамлакат бўйлаб душанба ва сешанба кунлари чиқишлар қилишга чақираман", - деб ёзди Гуайдо Twitter саҳифасида.

Аввалроқ АҚШнинг Венесуэла бўйича махсус вакили Эллиотт Абрамс мамлакат ҳукуматини Колумбиядан қайтмоқчи бўлган Гуайдони ҳибсга олмаслик ҳақида огоҳлантирганди. Гуайдо 22 феврал куни Венесуэлани тарк этиши тақиқланган бўлса-да, Колумбиянинг Кукута шаҳрига борганди. Венесуэла олий суди вакили Хуан Карлос Вальдес Гуайдо тақиқни бузиб мамлакатни тарк этгани учун 30 йилгача қамалиши мумкинлиги ҳақида маълум қилганди.Гуайдо 23 январда ўзини вақтинчалик президент деб эълон қилганди. Ўшандан бери мамлакатда сиёсий инқироз давом этмоқда.

Тайёрлаган Дилшод Аскаров

#Венесуэла #Гуайдо

Венесуэла президент Николас Мадурога қарши оммавий норозилик намойишлари гирдобида қолди. 23 январь куни, ушбу намойишлар авжига чиққан вақтда Венесуэла парламенти раҳбари Хуан Гуайдо ўзини мамлакатнинг муваққат президенти деб эълон қилди