Karakas yaqinidagi eski binolardan birida Ugo Chaves hamon yashamoqda. Asosiy zalda Venesuelaning sobiq prezidentining harbiy libosdagi ulkan haykali o‘rnatilgan. U binoga kirib kelguvchilarni viqor bilan qarshilaydi.
Devorda Chaves Venesuelaning milliy ranglari - sariq-ko‘k-qizil rangdagi formada jilmayib turadi. Uning ostidagi katta stol ortida o‘zini Subero deb tanishtiruvchi kishi soatlab o‘tiradi.
Subero o‘n yillardan buyon Chavesga sadoqatli, gap faqat ideologiyada emas. 1992 yilning 4 fevralida o‘sha vaqtda 20 yoshda bo‘lgan, hozirda 47 yoshga chiqqan iste'fodagi serjant Subero Chaves tomonidan o‘sha vaqtdagi prezident Karlos Andres Peresga qarshi qilingan to‘ntarishda ishtirok etgandi.
O‘shanda isyon bostirilgan, Subero Chaves hamda boshqa isyonchilar bilan birga qamoqqa tashlangandi.
Ammo bu voqea Suberoning Chavesga ishonchiga zarracha putur yetkazmadi.
Foto: KEVIN JORDAN / GETTY IMAGES
Hozirda u Venesueladagi «kolektivos» (colectivos) deb nomlanuvchi o‘nlab guruhlardan biriga boshchilik qiladi. «Kolektivos» a'zolari o‘zlarini Chavesning bolivarcha inqilobi qo‘riqchilari deb atashadi hamda uning vorisi Nikolas Maduroga sadoqat izhor etishadi.
Maduro ayni vaqtda xalqaro hamjamiyatning qattiq bosimiga uchramoqda, jahon davlatlari uni iste'foga chiqib, muddatidan avvalgi prezidentlik saylovlari o‘tkazilishini talab qilishmoqda.
Janubiy Amerikaning aksar davlatlari, Yevropa, AQSh va Kanada endi Maduroni bu mamlakatning qonuniy prezidenti deb hisoblamaydi.
Ammo Subero va uning qo‘mitasining boshqa a'zolari 2013 yildan buyon Venesuelani boshqarib kelayotgan Maduroni himoya qilishga bel bog‘lashgan.
«Men uni himoya qilish uchun o‘lishga tayyorman», deydi Subero.
«Tashqi aralashuv»
Venesueladagi «kolektivos» guruhlari Chaves diktaturasi davrida paydo bo‘lgan va butun mamlakat bo‘ylab tarqalgan.
Ular rasman aholiga ijtimoiy yordamlar ko‘rsatish maqsadida tuzilgan bo‘linmalardir. Bunday guruhlar tarkibida minglab a'zolar bor.
Muxolifat vakillari va huquq faollari esa «kollektivos»ni qurolli guruhlarga aylanish va ma'lum hududlar ustidan nazorat o‘rnatib, hukumat tanqidchilari, namoyishchilar va jurnalistlarga hujumlar uyushtirishda ayblaydi.
