Тошкент вилоятида юз берган ЙТҲ оқибатида бир киши ҳалок бўлди

2019 йил 22 март куни Тошкент вилоятининг Юқори Чирчиқ туманида яшовчи Д.Т. бошқарувидаги “Нексия” русумли автомашинани “Янгибозор-Истиқлол” йўлида ҳайдаб кетаётиб, бошқарувни эплай олмай йўл четидаги зовурга ағдарилиб кетган.

Ўзбекистон Республикаси ИИВ Жамоатчилик ва оммавий ахборот воситалари билан алоқалар бошқармаси хабарига кўра, натижада автомашина йўловчиси С.А. жароҳат олиб воқеа жойида вафот этган ва ҳайдовчи ҳамда яна 2 нафар йўловчилари - Э.Г. ва А.Н. жароҳат олиб касалхонага ётқизилган. 

Ҳолат юзасидан дастлабки терговолди ҳаракатлари олиб борилмоқда, дейилади хабарда.