Мбаппе Бенземанинг рекордини янгилади

Франция миллий жамоаси Евро-2020 саралашининг 2-турида Исландияга қарши баҳс олиб бориб, 4:0 ҳисобида ғалаба қозонди. Париждаги учрашувда Самюэль Умтити, Оливье Жиру, Килиан Мбаппе ва Антуан Гризманн биттадан гол муаллифи бўлишди ва уларнинг ҳар бири ўзига хос натижа қайд этишди.

12-дақиқада ҳисобни очган Умтитининг ўйин давомидаги 107та пасидан барчаси манзилга аниқ етиб борди. Opta Sports маълумотига кўра, тўп узатишдаги 100 фоизлик аниқлик охирги 10 йилдан буён Франция термаси аъзоларининг ҳеч бирида кузатилмаганди.

Самюэль миллий жамоада 2016 йили дебют қилган ва ўшандан буён 4та тўп киритди. Бу – шу вақт давомида ҳар қандай ҳимоячидан икки баробарга яхшироқ кўрсаткичдир.

Оливье Жиру эса кечаги голи билан «учранглилар» тўпурарлари рўйхатида 3-ўринга чиқиб олди – энди унинг ҳисобида 35та гол бор. Ундан олдинроқда фақат Мишель Платини (41та гол) ва Тьерри Анри (51та гол) бормоқда.

Кечаги баҳсда ҳисобни йирик кўринишга келтирган гол муаллифи Килиан Мбаппе шу ўйинда иккита голга ассистентлик ҳам қилди. Squawka маълумотига кўра, унинг ҳам клубдаги, ҳам терма жамоадаги расмий ўйинлари сони 169тага етди. Бу баҳсларда Килиан 91та гол уриб, 48та голга узатма берган. Яъни, 20 ёшли ҳужумчи профессионал фаолиятининг бошидан буён ҳар 83,5 дақиқада ё гол урмоқда, ё голга ассистентлик қиляпти.

Исландия билан ўйин Мбаппе учун Франция миллий жамоаси либосидаги 30-учрашув бўлди. У бу чизиқни 20 ёш-у 3 ойлигида кесиб ўтди ва бу борада рекордчи футболчига айланди. Бундан аввалги рекорд Карим Бенземага тегишли эди: у «учранглилар» сафидаги 30-ўйинини ўтказганида 22 ёшга тўлганига 9 ой бўлганди.

Душанба оқшомида «Стад де Франс»даги баҳсга якуний нуқтани қўйган Антуан Гризманн ҳам французлар термасидаги статистикасини яхшилаб олди. Эндиликда у миллий жамоа тўпурарлари рўйхатида Юрий Жоркаефф билан бирга 7-ўринда бормоқда – уларнинг ҳисобида 28тадан гол бор. 6-поғонадаги Жан-Пьер Папен 30та, 4-5-ўринлардаги Давид Трезеге ва Зинедин Зидан 31тадан тўп киритган. Топ-учликда эса, юқорида таъкидланганидек, Оливье Жиру (35), Мишель Платини (41) ва Тьерри Анри (51) боришмоқда.

Қайд этиш керак, Франция термаси кечаги ўйинда мамлакат футбол федерацияси ташкил этилганига 100 йил тўлиши муносабати билан ретро-формада майдонга тушди. ФФФ бир асрлик юбилейини 7 апрелда нишонлайди.

Эслатиб ўтамиз, Дидье Дешам қўл остидаги жамоа ўтган ҳафта саралашнинг илк турида Молдова дарвозасига ҳам тўртта тўп киритганди (4:1). УЕФА расмий сайтида таъкидланишича, французлар 6 йил ичида илк маротаба кетма-кет иккита ўйинда камида тўрттадан тўп киритишнинг уддасидан чиқди.

2-турдан кейин «H» гуруҳида амалдаги жаҳон чемпионлари етакчилик қилмоқда. Шунингдек, Туркия ҳисобида ҳам 6 очко мавжуд.