Фото: Getty Images
Зинедин Зиданнинг «Реал» бошқарувига қайтиши ҳимоячи Марселони клубдаги келажаги бўйича қарорини ўзгартиришга ундади.
AS маълумотига кўра, бразилиялик футболчи Мадриддан кетиш фикридан воз кечган. Нашрга ушбу маълумотни Марселога яқин кишилар тасдиқлашган. У собиқ бош мураббий Сантьяго Солари билан яхши чиқишиб кета олмаган ва шу боисдан собиқ жамоадоши Криштиану Роналдунинг клуби «Ювентус»га ўтиб кетиш ҳақида ўйлаётганди.
Қайд этилишича, Зидан Марсело билан бафуржа гаплашиб олган ва уни ўз лойиҳасида муҳим фигурант сифатида кўраётганини билдирган.
Маълумот учун, 30 ёшли футболчи 2007 йилдан буён «қаймоқранглилар» таркибида ўйнаб келади. Бу мавсум у барча мусобақалар доирасида 26та ўйин ўтказиб, 3та гол урди ва 5та голга узатма берди.
