Эрдўған: АҚШ Туркияга яхшироқ таклиф билдира олмади

Вашингтон Анқарага АҚШнинг ракеталарга қарши мажмуалари Patriot бўйича Россия С-400 тизимларини харид қилиш шартномасидаги каби шартларни таклиф қила олмади. Бу ҳақда Туркия президенти Ражаб Тоййиб Эрдўған айтиб ўтди. 

“Биз С-400 бўйича келишувни якунига етказдик, шартнома бўйича тўловларни амалга оширмоқдамиз. АҚШга Patriot тизимларини сотиб олишни таклиф қилганимизда, АҚШ бизга тўғри келадиган шартларни таклиф қилмади. Шу сабабли С-400 бўйича битим амалга оширилмоқда ва июлда мажмуаларнинг етказилишини кутмоқдамиз”, деб айтган Эрдўған Haberturk телеканали эфирида. Эрдўған Вашингтоннинг Анқара томонидан С-400 сотиб олиниши масаласи бўйича позицияси “жуда нотўғри” ва “Туркияга ёқмаётганини” айтган. 

Вашингтон Анқара С-400’ни сотиб олиш режаси сабабли Туркияга F-35 қирувчи самолётлари учун қурилмаларни етказишни тўхтатишини эълон қилган.  

Эрдўған бу борада тўхталиб, Туркия келишув доирасида самолётларни олишда давом этаётганини айтган.

Эрдўған, шунингдек, НАТО бош котиби Йенс Столтенбергнинг Анқара ва Вашингтон ўртасидаги ихтилоф бўйича айтган фикрларини эслаб ўтган. “Бош котиб муҳим нарсаларни айтди. У альянснинг аъзоларига қарши бирор-бир санкция киритиш нотўғрилиги, чунки биз бир-биримизга эҳтиёж сезишимизни айтди”, деб қўшимча қилган Туркия етакчиси.