Ўзбекистондаги биринчи пуллик йўл қурилиши қачондан бошланиши маълум бўлди

2019 йилнинг IV чорагида мамлакатдаги биринчи пуллик йўл қурилишини бошлаш режалаштирилмоқда. Бу ҳақда Ўзбекистон Республикаси Президентининг “Республика иқтисодиётига тўғридан-тўғри хорижий инвестицияларни жалб қилиш механизмларини янада такомиллаштириш чора-тадбирлари тўғрисида”ги қарорида айтилади.

Ҳужжатга кўра,  Cengiz Enerji Sanayii ve Ticaret A.S., «Калён», «Колин» (Туркия) компаниялари консорциуми билан Тошкент - Самарқанд пулли автомобиль йўлини қуриш лойиҳаси амалга оширилади.

У Тошкент, Сирдарё, Жиззах вилоятлари ҳудудидан ўтади. Лойиҳа қиймати ҳозирда аниқланмоқда.

Бунда 2019 йил 2-чоракда халқаро молия институтлари билан консалтинг хизматини кўрсатиш бўйича битим тузиш, 2019 йил май ойида - автомобиль йўли маршрутини ўрганиш ва дастлабки ҳисоб-китобларни ишлаб чиқиш, 2019 йил июнда - ДХШ битими шартлари бўйича музокаралар олиб бориш, 2019 йил июлда - битимни имзолаш режалаштирилган.

2019 йил 4-чоракда қурилишни бошлаш ва 2021 йил 4-чоракда фойдаланишга топшириш мўлжалланмоқда.

Бундан олдин, Тошкент - Андижон пуллик автомобиль йўли қурилиши хабар берилганди.