Деҳли аэропортида тузилган режа Тошкент аэропортида чиппакка чиқди

Божхоначилар томонидан Ўзбекистонга уяли телефонларни ноқонуний олиб кириш ҳолатига ўз вақтида чек қўйилди.

“Тошкент-Аэро” ихтисослаштирилган божхона комплексининг Контрабанда ва божхона қонунчилиги бузилишига қарши курашиш бўлими ходимлари томонидан, аэропорт автотураргоҳида “Деҳли-Тошкент” йўналиши бўйича учиб келган йўловчилардан телефонларни йиғиб олаётган фуқаро Т.А. ашёвий далиллар билан қўлга олинди.

Маълум бўлишича, ушбу шахс божхона тўловларидан қочиш мақсадида Деҳли аэропортида умумий қиймати 39 миллион сўмлик 26 дона “Redmi 6 Pro” уяли алоқа воситаларини Тошкент аэропортида йиғиб олиш илтимоси билан тарқатиб, мамлакатимизга ноқонуний равишда олиб кирмоқчи бўлганлиги аниқланди. Аммо унинг бу режаси амалга ошмади.

Ҳозирда мазкур ҳолат юзасидан текширув ҳаракатлари олиб борилмоқда.