Роналдунинг онаси ўғлининг мавжуд бўлмаган ютуғи билан фахрланди

“Ювентус” ҳужумчиси Криштиану Роналдунинг онаси Долорес Авейру ўғлидан фахрланиб, кулгили хатога йўл қўйди.

Роналдунинг онаси твиттерда ўғлининг сурати ва унга илова қилинган ҳақиқатга тўғри келмайдиган матнга “чув тушиб”, ўғлидан фахрланишини ёзган. Суратга матнда “Ювентус” португалиялик футболчининг келишигача чуқур инқирозда бўлгани ва айнан унинг саъй-ҳаракатлари эвазига 20 йилдан кейин чемпион бўла олгани ҳақида ёзилган бўлган.

Роналдунинг онаси эса бу суратга “Менинг фахрим, менинг ўғлим” деб изоҳ қолдирган.

Ваҳоланки, Роналдунинг “Ювентус”га ўтишигача клуб Италия чемпионатида қаторасига 7 марта чемпион бўлишга муваффақ бўлган. 

34 ёшли Роналду Турин клубига 2018 йил ёзида “Реал”дан ўтган. У жорий мавсумда Италия чемпионатининг 29 та ўйинида иштирок этиб, 21 та гол ва 8 та голли узатмага муаллифлик қилди.