Овоз кучайтиргич ичига яширилган телефонлар фош этилди

Тошкент халқаро аэропортида божхоначилар навбатдаги қонунбузарлик ҳолатларини аниқлашди.

“Сеул-Тошкент” йўналиши бўйича учиб келиб, “яшил” йўлак орқали ҳаракатланган фуқаро Д.Д.нинг багажи назорат тартибида махсус сканерлар ёрдамида божхона кўригидан ўтказилди.

Натижада, “устомонлик” билан ўйланган қонунбузарлик фош этилди. Яъни, фуқаро Д.Д божхона тўловларидан қочиш мақсадида ҳеч қандай ҳужжатлари бўлмаган, декларацияланмаган 8 дона ҳар хил русумдаги уяли алоқа воситаларини овоз кучайтиргич ичига яширилган ҳолда олиб кирмоқчи бўлган экан. Аммо унинг бу найранги иш бермади.

Шунингдек, айни шу авиарейс билан учиб келган фуқаро Р.Д хам божхона назоратидан ўтказилганда яширинча олиб кирмоқчи бўлган 5 дона уяли телефонлари борлиги аниқланди.

Яна бир ҳолатда эса, “Пекин-Тошкент” йўналиши бўйича учиб келган фуқаро Б.А. ҳам сал кам 13 миллион сўмлик сифати кафолатланмаган тиббиёт ускуналарини ноқонуний олиб киришга бўлган уриниши бесамар якунланди.

Ҳозирда ушбу ҳолатлар юзасидан текширув ҳаракатлари олиб борилмоқда.