«Манчестер Сити» еврокубоклардан четлатилиши мумкин

УЕФАнинг молиявий назорат бўйича тергов палатаси «Манчестер Сити»ни молиявий фэйр-плей қоидаларини бузганликда айблаб, клубни еврокубоклардан четлаштириши мумкин, деб хабар тарқатди The New York Times.

Манбада келтирилишича, тергов палатаси раҳбари «шаҳарликлар»нинг бир мавсумга еврокубоклардан дисквалификация қилинишини талаб қилиб чиқмоқчи.

Англия чемпиони 2014 йилда ҳам молиявий фэйр-плей қоидалари билан боғлиқ муаммога дуч келиб, 49 млн фунт жарима тўлаган эди. Ҳозир эса клуб ўша иш кўриб чиқилаётган вақтда нотўғри маълумот тақдим этганликда гумонланмоқда. Шунингдек, «Сити»га нисбатан ҳомийлик шартномаларининг қиймати борасида ёлғон ахборот бериш айблови ҳам илгари сурилган.

Ўз навбатида, «Манчестер Сити» барча айбловларни рад этаётгани айтилмоқда.

Эслатиб ўтамиз, УЕФА март ойида Манчестернинг ушбу клуби устидан текширув бошлаганини эълон қилган эди.