Forbes дунёнинг энг қиммат футбол клублари номини эълон қилди

Мадриднинг «Реал» клуби икки йиллик танаффусдан сўнг жаҳоннинг энг қиммат футбол клублари рейтингида биринчи ўринга қайтди. Forbes журналининг ёзишича, Испания жамоасининг қиймати 4%га ўсиб, 4,24 млрд долларга етган.

Миллий чемпионатда ғолиб бўлган «Барселона» 4,02 млрд доллар қиймат билан рейтингда иккинчи бўлди.

Ўтган йили акциялари юқори даражага етган «Манчестер Юнайтед» учинчи ўринда жойлашди. Унинг нархи 3,81 млрд долларни ташкил этди.

Германия чемпиони — Мюнхеннинг «Бавария»си тўртинчи (3,02 млрд доллар), Италия чемпиони «Ювентус» 10-, Франция чемпиони ПСЖ 11-ўриндан жой олди.

Дастлабки йигирматаликда Англия премьер-лигаси вакиллари кўпчиликни ташкил этади. Рўйхатда «Манчестер Юнайтед» билан бирга «Манчестер Сити» (5-ўрин), «Челси» (6-ўрин), «Арсенал» (7-ўрин), «Ливерпуль» ва «Тоттенхэм» (8- ва 9-ўринлар), «Вест Хэм» (17-ўрин), «Эвертон» (19-ўрин) ва «Ньюкасл Юнайтед» (20-ўрин) бор.