Козим Тўлаганов: қурилиш соҳасида кадрлар тақчиллиги кузатилмоқда

Қурилиш вазири ўринбосари қурилиш соҳасига чет элдан инвестор олиб кириш масаласига ойдинлик киритди. Унинг айтишича, Ўзбекистонда амалга оширилаётган қурилиш ишларининг аксарияти (давлат дастурларидан ташқари – таҳр.) инвесторлар ҳисобига амалга оширилмоқда. Шу билан бирга, қурилиш индустриясида кадрлар тақчиллиги кузатилмоқда. 

«Инвесторларни Ўзбекистонга олиб келиш масаласи барча даражадаги раҳбарларнинг кун тартибида турган масала. Бир мисол. Тошкент маркази Tashkent City қуриляпти. 8та лот 8та алоҳида мажмуа деганидир. Буларнинг барчаси инвестор ҳисобига бажариляпти. 

Бюджетдан бирор сўм бу ерга сарфлангани йўқ. Давлат раҳбари томонидан қўйилаётган талаб бу. «Қишлоққурилишинвест» маблағининг асосий қисми ҳам четнинг (Осиё Тараққиёт банки) маблағи. Қайтариб бериш шарти билан олинган. 

Бир мисол, ўтган йили Ўзбекистонда 5 млн квадрат метр қурилди. Бунақаси тарихда бўлмаган. Тошкентда энг кўп уй-жой қурилгани, 1987 йилда 1 млн 13 минг квадрат метр ҳисоботда қайд қилинган. Ўтган йили Тошкентнинг ўзида 1 млн 24 минг квадрат метр ҳисобланди. 

Неча йиллар тўхтаб ётганди. Ҳеч нарса йўқ эди. На қурилиш ташкилоти, на саноати, на кадр бор эди. Ҳозир эса, мутахассисларни қайтадан ўқитиш, уларга сертификат бериш масалалари бўйича бошимиз қотяпти», - деди Тўлаганов.