Японияда аниме-студияга ўт қўйилиши оқибатида 33 киши ҳалок бўлди

Япониянинг Киото шаҳрида Kyoto Animation Co. аниме-студиясига ўт қўйилди. Бунинг оқибатида 33 киши ҳалок бўлган, ўнлаб одамлар жароҳатланган.

Маҳаллий ОАВнинг хабар беришича, 18 июль эрталаб студияга бир эркак бостириб кириб, бинога бензин қуйиб, ёнғин уюштирган. 

Ёнғин Kyoto Animation Co’нинг 3 қаватли биносида маҳаллий вақт билан соат 10:30да бошланган. Воқеа жойида қутқарув ишлари олиб борилмоқда. Ўнлаб одамлар бедарак йўқолган деб ҳисобланмоқда. Бинонинг 3-қаватида одамлар қолиб кетган бўлиши мумкинлигидан хавотир билдирилган.

Ёнғинни содир этишда гумон қилинган эркак ёнғин вақтида олинган жароҳатлар билан шифохонага етказилган. Маълум қилинишича, у 41 ёшда бўлиб, студия ходими бўлмаган. Уни ҳозирча сўроқ қилишнинг иложи бўлмаган.

Полиция воқеа жойида пичоқлар ҳам топган. Гувоҳларнинг айтишича, дастлаб кучли портлаш юз берган, сўнгра аланга бутун бинони қамраб олган.

Ҳозирда шифохоналарда 36 жабрланувчи бор бўлиб, улардан баъзилари оғир аҳволда. Ёнғин бошланган вақтда бинода 70 га яқин одам бўлган.

Мамлакат бош вазири  Синдзо Абэ ҳалок бўлганлар оилаларига ҳамдардлик билдирган. 

Таъкидланишича, ёнғин бошланганда гумонланувчи бинодан югуриб чиқиб, яқин орадаги бекатга йўл олган, бироқ йўлда ерга йиқилиб тушган.

Студия директори Хидэаки Хатта NHK телекомпаниясига интервьюсида студия яқинда таҳдидлар билдирилган электрон мактублар олганини маълум қилган.

“Улар идорамизга ва савдолар бўлимига йўлланган бўлган, бизга ўлим билан таҳдид қилишганди”, деб айтган Хатта.

Kyoto Animation (ёки KyoAni) машҳур аниме-студиясига ҳисобланиб, унга 1981 йилда асос солинган.

Агар ёнғин уюштириш тахмини тасдиқланса, унда бу Японияда 2016 йилда бери содир этилган энг оммавий жиноят бўлади. Ўшанда бир эркак Токио яқинидаги ногиронларга мўлжалланган муассасада 19 кишини пичоқлаб ташлаган. Япониянинг урушдан кейинги тарихида қурбонлар сони бўйича энг йирик ёнғин 2001 йилда Токионинг Кабуки-тё мавзесидаги ўт қўйилиши ҳисобланади. Ўшанда 44 киши ҳалок бўлган.