2019 йилнинг 17 июль куни Диний эркинликларни илгари суриш масалаларига бағишланган иккинчи вазирлар конференциясида иштирок этиш учун Вашингтон шаҳрига Ўзбекистон делегациясига бошчилик қилиб келган ташқи ишлар вазири Абдулазиз Комилов АҚШнинг Афғонистондаги ярашиш масалалари бўйича Махсус вакили Залмай Халилзод билан учрашди.
Афғонистон йўналишидаги ҳамкорлик бўйича мунтазам Ўзбекистон – АҚШ мулоқоти доирасида мазкур мамлакатда тинчлик ўрнатиш борасидаги сиёсий жараённинг ҳозирги ҳолати ва унинг истиқболлари юзасидан фикр алмашилди, дейилади ТИВ хабарида.
Учрашувда Доҳа шаҳрида (Қатар) бўлиб ўтган афғонлараро конференция якунлари қўллаб-қувватланди ва музокаралар кўп йиллик афғон можаросини тинч йўл билан ҳал қилишнинг ягона усули эканлиги тасдиқланди.
АҚШ томони Афғонистонда тинчлик ўрнатишга қаратилган сиёсий жараённи бошлашга кўмаклашиш ҳамда энергетика ва транспорт соҳаларида муҳим инфратузилма лойиҳаларини амалга ошириш борасидаги Ўзбекистон саъй-ҳаракатларини қўллаб-қувватлашини билдирди.
