Навоийда ўлакса гўштни сотган ота-бола қўлга олинди

Навоий вилоятида қассоб ўлган ҳайвонлар гўштини барра гўшт кўринишида сотган. Бу ҳақда “Навоий-24” хабар берди. 

18 июлда Бош прокуратура ҳузуридаги департамент ходимлари ўлган ҳайвонлар гўштини сотган қассоб ва унинг ўғлини ушлашди. “Уддабурон” ота-бола “Навоий Агро Мят” хусусий корхонаси яқинида ўлакса гўштни 1,2 млн сўмга сотиб олмоқчи бўлган вақтда қўлга олинган.

Умумий ҳисобда қассобдан 1,7 тонна гўшт мусодара қилинган. Текширув вақтида Навоий вилояти ҳайвонлар касалликлари диагностикаси ва озиқ-овқат маҳсулотлари хавфсизлиги маркази ходими 1 млн сўмга қассобга истеъмол учун яроқсиз 892 кг гўштни сотишга тегишли рухсатномани расмийлаштириб бергани аниқланган.

Қўлга олинган шахсларга нисбатан Ўзбекистон Жиноят кодексининг 209-моддаси (Мансаб сохтакорлиги) бўйича жиноий иш қўзғатилган.