Интеллектуал мулкка эгалик учун рўйхатдан ўтиш ДХМ орқали амалга оширилади

Жорий йилнинг сентябрь ойидан бошлаб интеллектуал мулкка эгалик бўйича рўйхатдан ўтиш Давлат хизматлари марказлари орқали амалга оширилади. Бу ҳақида “Интеллектуал мулк агентлигида коррупцияга қарши кураш ва унинг олдини олиш бўйича амалга оширилаётган ишлар” мавзусидаги матбуот анжуманида маълум қилинди.

“Ҳозирда интеллектуал мулк учун эгалик ҳуқуқини рўйхатдан ўтказишни истовчилар бевосита агентликнинг ўзига мурожаат қилишади. Агентлик ва аризачилар ўртасидаги бевосита мулоқотни чеклаш, мурожаатчиларга қулайлик яратиш мақсадида рўйхатдан ўтказиш жараёни давлат хизматлари марказлари орқали амалга оширилиши кутилмоқда. Бу бўйича Вазирлар Маҳкамаси қарори лойиҳаси тайёрланган, ҳозирда муҳокама жараёнида. Икки ҳафтадан сўнг бу жараён тест режимида ишлай бошлаши, сентябрда тўлиқ ишга тушиши мўлжалланган”, ─ дейди Адлия вазирлиги ҳузуридаги Интеллектуал мулк агентлиги директор ўринбосари вазифасини бажарувчи Анвар Раҳматов.

Матбуот анжуманида маълум қилинишича, интеллектуал мулкка эгалик ҳуқуқини эътироф этиш жараёнида коррупцион ҳолатларнинг олдини олиш мақсадида агентлик тизимида мулоқотнинг фронт офис шакли йўлга қўйилиши режалаштирилган.

“Интеллектуал мулкка эгалик бўйича рўйхатдан ўтиш учун ариза топширганлар ва экспертлар гуруҳи ўртасида бевосита мулоқотнинг юзага келмаслиги, шаффофликни таъминлаш учун яқин кунларда фронт офис тизими йўлга қўйилади. Яъни аризачи ва унинг аризасини кўриб чиқадиган шахс ўртасида блог бўлади, уларнинг қаерда, қай тартибда мулоқот қилиши, камералар кузатуви остида бўлиши, мутахассиснинг фақатгина мансаб йўриқномасидан келиб чиққан ҳолда маълумот бериши қатъий белгилаб қўйилади”, ─ дейди агентлик юридик бўлими бош юрисконсултанти Гулчеҳра Юсупхонова.

Баён қилинишича, интеллектуал мулкка эгалик бўйича рўйхатдан ўтказиш жараёнидан норози бўлган мурожаатчилар учун апелляция кенгаши ташкил этилиши белгиланган. Бу низоларни судгача бўлган жараёнда кўриб чиқиш имконини беради. Ариза берувчи ўз аризасига берилган жавобдан норози бўлса, ноқонуний гувоҳномалар берилишига шубҳа бўлса, Адлия вазири раислик қилувчи апелляция кенгашига мурожаат қилиши мумкин бўлади.  Шаффофлик ва объективликни таъминлаш мақсадида мазкур кенгаш аъзоларининг 30 фоизида Адлия вазирлиги ва Интеллектуал мулк агентлиги ходимлари, 70 фоизида бошқа идора ва ташкилотларнинг малакали мутахассислари жалб қилинади. Апелляция кенгашининг қароридан ҳам норози бўлганлар бу қарор устидан олти ой ичида судга мурожаат қилиши мумкин.