“АрМИ — 2019”: Ўзбекистонлик муҳандис-сапёрлар учинчи ўринни эгаллади

Кеча, 11 август куни бешинчи бор ўтказилаётган Халқаро армия ўйинларининг “Хавфсиз маршрут” йўналиши якунига етди. Унда ўзбекистонлик ҳарбийлар кучли учликдан ўрин эгаллади. Бу ҳақда Мудофаа вазирлиги Ахборот ва оммавий коммуникациялар департаменти хабар берди.

Россия Федерациясининг Тюмень вилоятида жойлашган дала-ўқув майдонида бўлиб ўтган ярим финал баҳсида кураш олиб борган ўзбекистонлик ҳарбийлар халқаро мусобақанинг биринчи кунидан маррани қўлдан бой бермасликка ҳаракат қилди.

Ҳарбий мусобақа шарт-шароитлари жанг ҳолатига максимал яқин бўлиши учун узунлиги 6000 метрга яқин беллашув йўлагига 250 дан зиёд имитацион, сигнал ва портловчи-ёнувчи зарядлардан иборат электропортловчи тармоқ ётқизиб чиқилган эди. Мусобақага янада шиддат ва кескинлик олиб кириш учун Су-24 фронт бомбардимончиси ва Ми-8 транспорт-жангари вертолётларининг шартли авиазарбалари билан беллашув бошланди. Беларусь, Вьетнам, Ўзбекистон ҳамда Россия жамоалари ўртасида ўтказилган финал босқичи қизғин баҳсларга бой кечди.

Хусусан, вертолёт макетидан десантлаштирилган ҳолатда тушиш, осма кўприк ва сеткали девор тўсиқларидан ўтиш, бинони портлатиб, ишғол қилиш, сим тўсиқли мина майдонини тозалаш ҳамда сувли тўсиқлардан ўтиш шартларида ўзбек муҳандис-сапёрлари пешқадамлик қилди.

Юртдошларимизнинг узунлиги 30 ва 6 метр бўлган ҳудудни миналардан тозалаш, узунлиги 40 метр бўлган сув ҳавзасига ТММ-3 (оғир механизациялашган кўприк) техникалари ёрдамида кўприк ўрнатиб, шахсий таркибга йўл очиш шартларидаги аниқ ҳаракатлари томошабинлар олқишига сазовор бўлди. БАТ-2 йўл қурувчи ва ИМР-2 тўсиқлардан ўтиш муҳандислик техникаси ёрдамида берилган шартларни тўлақонли бажаришга ҳаракат қилишди.

Якуний натижаларга кўра, Ўзбекистон жамоаси мазкур мусобақада учинчи ўринга лойиқ деб топилди. Россия Федерацияси биринчи, Беларусь Республикасига эса иккинчи ўрин насиб этди.

Мазкур мусобақа давомида БАТ-2 йўл қурувчи муҳандислик техникаси экипажи аъзолари – механик-ҳайдовчи, шартнома бўйича ҳарбий хизмат оддий аскари Шавқиддин Нарзуллаев ва БАТ-2 йўл қурувчи муҳандислик техникаси ҳисоби, кичик сержант Феруз Гуччиев “АрМИ-2019” халқаро армия ўйинларининг “Хавфсиз маршрут” мусобақасида “Энг илғор БАТ-2 экипажи” номинацияси ғолиби дея эътироф этилди.