Туркияга АҚШ ҳарбийлари делегацияси келди

Фото: AFP 2019 / Omar Haj-Kadour

Туркия мудофаа вазирлиги Шонлиурфа вилоятига олти нафар америкалик ҳарбий келганини тасдиқлади. Улар Қўшма операциялар ва Сурия шимолидаги режалаштирилаётган хавфсизлик ҳудуди бўйича координацион марказда иш олиб боришади.

Бир оз аввал Haberturk телеканали Шонлиурфага 90 нафар америкалик ҳарбий келганини хабар қилганди.

"АҚШ билан ҳамкорликда Қўшма операциялар ва Сурия шимолидаги режалаштирилаётган хавфсизлик ҳудуди бўйича координацион марказ ташкил этиш ишлари бошланди. Дастлабки тайёргарлик доирасида Шонлиурфага олти кишидан иборат АҚШ делегацияси ташриф буюрди. Марказ яқин кунларда иш бошлаши режалаштирилган", - дейилади мудофаа вазирлиги хабарида.

Аввалроқ Анқарада Сурия шимолида хавфсизлик ҳудуди ташкил этиш бўйича Туркия-АҚШ музокаралари якунига етганди.