Киев аэропортида Исроилга экстрадиция қилинаётган наркосавдогар ғойиб бўлди

Киевнинг "Борисполь" аэропортида Исроилга экстрадиция қилиниши керак бўлган АҚШ фуқароси ғойиб бўлди. Бу ҳақда Киев прокуратураси маълум қилди. Полициянинг аниқлик киритишича, унинг исми Амос Дов Сильвер бўлиб, у наркосавдогарликда гумон қилинмоқда.

У халқаро қидирувда бўлиб, мартда Украинада қўлга олинган. 15 август куни у Украина хавфсизлик хизмати ходимлари конвойи аэропортга олиб келганидан сўнг ғойиб бўлган. Киев полицияси матбуот хизматининг билдиришича, унинг билагидан электрон билагузук ечиб олинган ва паспорт назоратидан сўнг у duty free ҳудудида йўқолиб қолган.

Ушбу ҳолат бўйича жиноят иши қўзғатилган.

Амос Дов Сильвер АҚШ ва Исроил фуқароси ҳисобланади. У Telegrass марихуанасини сотиш бўйича йирик халқаро интернет тармоқ асосчиси ҳисобланади.