Жанубий Кореяда Германиянинг собиқ канцлери устидан судга арз қилинди

Германиянинг собиқ канцлери Герхард Шрёдер бузуқликда айбланмоқда. Шрёдернинг ҳозирги рафиқаси Со Ен Шрёдер-Кимнинг собиқ турмуш ўртоғи Жанубий Корея судига шу айблов билан Шрёдер устидан арз қилган. Унинг таъкидлашича, Со Ен ва канцлернинг ишқий муносабатлари аёл ҳали никоҳда бўлганда бошланган.

Аёлнинг исми овоза қилинмаётган собиқ турмуш ўртоғининг таъкидлашича, айнан шу муносабатлар унинг Ким Со Ен билан ажрашишига олиб келган. Шу сабабли эркак бошдан кечирган “изтироблари” учун компенсация сифатида 100 млн вон (93 минг доллар) талаб қилмоқда. 

75 ёшли Шрёдер арз ҳақида расмий хабарномани бир неча кун олдин олган. Унинг рафиқаси айбловларни рад этган. Аёлнинг таъкидлашича, у Шрёдёрни учратганда унинг собиқ турмуш ўртоғи билан никоҳи бузилган бўлган ва улар ажралишиб кетишган.

Жанубий Кореяда эр ёки хотиннинг хиёнати 2015 йилдагина декриминаллаштирилган. Бунгача хиёнат қилиш 2 йилгача озодликдан маҳрум қилиниш билан жазоланган. Ўтган вақт ичида 53 мингга яқин жанубий кореялик хиёнати учун жазоланган.   
 
Шрёдер 1998 йилдан 2005 йилгача Германия канцлери бўлган. У Ким Со Ен билан 2015 йилда Сеулдаги анжуманда танишган. Аёл у ерда таржимон бўлиб ишлаган. Кейинчалик у Шрёдернинг автобиографиясини корейс тилига таржима қилган. 2018 йилда 49 ёшли аёл собиқ канцлернинг 5-рафиқасига айланган. Уларга ёшларидаги 25 йиллик фарқ ҳам халақит қила олмаган.