Халқаро коинот станциясида араб таомлари тортилади

Халқаро коинот станциясига БААнинг илк фазогири Ҳазза ал-Мансурий келгандан кейин араб таомларидан иборат тушлик ўтказилади. Тадбир 29 сентябрга белгиланган ва станциянинг АҚШга тегишли сегментида бўлиб ўтади.

Ал-Мансурий “Союз МС-15” кемасида ХКСга араб таомларини олиб келади. Тушликка барча фазогирлар таклиф этилган.

Ҳозирда ХКСда россиялик фазогирлар Алексей Овчинин ва Александр Скворцов, америкалик Ник Хейг, Кристина Кук ва Эндрю Морган ҳамда италиялик Лука Пармитанодан иборат экипаж фаолият юритмоқда. 25 сентябрда уларга янги экипаж аъзолари россиялик Олег Скрипочка, америкалик Жессика Меир ва БААлик ал-Мансурий қўшилади.

Аввалроқ Россиянинг “Лаборатория космического питания” корхонаси биринчи араб фазогири учун ҳалол таомлар тайёрлаши маълум қилинганди. Бу таомлар орасида товуқдан мадруба, қўй гўшти ва сабзавотлардан салуна ва балалит (вермишел қуймоқ билан) бор. БААлик фазогир ХКСда 3 октябргача 8 кун ўтказиб, Ерга Овчинин ва Хейг билан қайтади.

“Союз МС-15” кемаси ХКСга 25 сентябрь Тошкент вақти билан соат 18.58да парвоз қилади.