Тарихда биринчи марта ХКСга бир вақтнинг ўзида 8 та космик кема уланди

Станция шунчалик банд бўлиб қолдики, яқинда NASA Cygnus юк кемасини вақтинча четга суришга ҳам мажбур бўлди.

Фото: NASA

Халқаро космик станция (ХКС) тарихда биринчи марта космик кемалар билан тўлиқ банд бўлди. NASA вакиллари ХКС ҳозирги конфигурациясидаги барча саккизта уланиш нуқтаси ишлатилаётганини тасдиқлади - бундай ҳолат ҳали бўлмаган.

Станция шунчалик банд бўлиб қолдики, яқинда NASA Cygnus юк кемасини вақтинча четга суришга мажбур бўлди. Бу NASA астронавти Крис Уилямс ва «Роскосмос» космонавтлари Сергей Куд-Сверчков ва Сергей Микаевни орбитага олиб чиққан «Союз МС-28» кемаси учун жой бўшатиш мақсадида амалга оширилди.

Улар келишидан олдин NASA Ҳюстондаги парвозларни бошқариш маркази Canadarm2 робот қўли ёрдамида Cygnus юк кемасини эҳтиёткорлик билан четга сурди. Бундай манёврлар камдан-кам учрайди, лекин бошқа иложи йўқ эди.

Станцияда Россиянинг «Причал» модулига уланган «Союз МС-27» кемаси ҳам бор. Бироқ у тез орада, 8 декабр куни Ерга қайтади. Унинг бортида NASA астронавти Жонни Ким ва «Роскосмос» космонавтлари Сергей Рижиков ва Алексей Зубрицкий қайтади. Қўниш Қозоғистонда амалга оширилади.

Қолган бешта кема - Россиянинг «Прогресс М-92» ва «Прогресс М-93» юк кемалари бўлиб, улар «Поиск» ва «Звезда» модуллари ёнида, Япониянинг HTV-X1 кемаси «Гармония» модули порти ёнида, шунингдек, SpaceX компаниясининг иккита Dragon капсуласи ҳам бор.

ХКС ресурси аста-секин тугаб бормоқда. Станция фаолиятини тўхтатишнинг бошланиши 2027 йилга мўлжалланган бўлиб, тахминан 2030 йилгача давом этади. Шундан сўнг, у орбитадан чиқарилади ва Тинч океанига чўктирилади. Унгача янги орбитал станциялар пайдо бўлади.